Monday, May 14, 2007

सराव

इथे कोण कधी कोणाचा होता
जो तो फक्त आपला एकट्याचा होता

रिकामा रिकामा प्याला वाटतो हा
दोष यात थरथरत्या हाताचा होता

कसा पाय जमिनीवर राहणार ठाम
मोह असा त्या एका क्षणाचा होता

सुख दुसर्‍याचे पाहवेना का त्यांना
बांधला जरी इमला कष्टाचा होता

मी धूर्त, मूर्ख, होतो कातडीबचाव, की
चुकला कोन तुमच्या बघण्याचा होता

मला सांगण्याची, वाटली लाज तुम्हा
धक्का इतका पुरेसा अपमानाचा होता

दुखर्‍या जखमांचे मला काय कौतूक
एकेक घाव आता सरावाचा होता


अभिजित...

Labels: ,

Tuesday, January 09, 2007

दाखला

दिसणारा हर एक जण परका वाटला होता
ओळखी पुसायचा मी घाट घातला होता

कधी होणार समतल ही जातींची उतरंड
तसा शबरीच्या बोराने रामही बाटला होता

हा कसा अवेळी अंधार पसरला आहे
सूर्य वटवाघळांनी दिवसा झाकला होता

ढोंग पावित्र्याचे जेव्हा उघडे पडले
माझाच चेहरा तेव्हा मलाच हासला होता

क्षुद्रापरी चिरडतात हे मानवी जीवाला
पाहून रौद्र इथले शैतान लाजला होता

ठाऊक मजला आहे पैसा धुळीतला मी
न ठोकरून त्यांनी माझा मान राखला होता

आता बटीक कायद्याकडून नाही कसली अपेक्षा
पाय चाटी तुमचे तो सर्वात लाडला होता

धार आहे म्हणता शब्दांना तुम्ही माझ्या
माझ्याकडे स्वत:च्या जीवनाचा दाखला होता


अभिजित...

Labels:

Wednesday, October 11, 2006

झुंज

तोडा त्या श्रृंखला फेका ही बंधने
उठूद्या झुंजार ज्वाला पेटवा तुमची तने

प्रेषितांची वाट बघण्या वेळ नाही आता
तुमचे शब्द सूक्ते अन् आयुष्य दाखला बने

ढेकळापरी मातीच्या फुटतील कारागृहे
जाणवू द्या त्यांनाही हृदयातील स्पंदने

कुत्सित जन हसतील म्हणतील, "हे कोण?"
अनलाने दिली न ओळख जाळली नुसती वने

बक्षिसापरी झेलुया घाव हे पदोपदी
ध्येयावर निष्ठा हे मलम तुला वेदने

कूपात सडणाऱ्यांचा खच हा इतस्तत:
यातनामुक्ती द्याया तुला आलो हे अवने

स्वागतास तुमच्या वाजतील सनई-चौघडे
सिद्ध व्हा साद द्या प्याऱ्या युद्धगर्जने

गोंजारणार कुठवर ही षंढ उद्विग्नता?
विश्व'जित' आहा तुम्ही चेतवा तुमची मने


अभिजित....

Labels:

Saturday, October 07, 2006

कीर्ती

या सुन्या घरट्याची तुला खंत का रे?
झाली पिले मोठी, हा होय अंत का रे?

विजयात तुम्ही त्यांच्या फुंकल्या तुताऱ्या
हार दोन घालून, झाले ते महंत का रे?

हे फुकाचे ज्ञान पाजती सर्व जगाला
घेती टाळ्या यांना, म्हणू मी संत का रे?

लुटती जनतेला हे बाबू आणि मंत्री
लाटल्या देणग्या ज्यांनी, ते हे पंत का रे?

मंथरेचे दास हे, हे शकुनीचे पाईक
या थोर भुरट्यांची, कीर्ती दिगंत का रे?

'जीत' आहे हीन, अन अर्थहीन कवतिके
या निष्पाप धरणीची, दु:खे अनंत का रे?


अभिजित.....

Labels:

Thursday, September 28, 2006

अर्धा मी अन अर्धी तू

एकाच छत्रीत, अर्धा मी अन अर्धी तू
भिजलो मात्र, अर्धा मी अन अर्धी तू

चिंब पावसाच्या सरी बरसल्या
शहारलो मात्र, अर्धा मी अन अर्धी तू

कोसळत्या पावसात निर्जन वाटेवर
हरवलो मात्र, अर्धा मी अन अर्धी तू

निनादली दामिनी, कडाडले ढग
घाबरलो मात्र, अर्धा मी अन अर्धी तू

वाफ़ाळत्या चहाचा हिंदकळता कप
गारठलो मात्र, अर्धा मी अन अर्धी तू

पावसाची रिपरिप, पानांची सळसळ
मोहरलो मात्र, अर्धा मी अन अर्धी तू.


अभिजित.....

Labels:

Wednesday, September 27, 2006

चंद्रिका मनामधी भरली

पाहता चंद्रिके तुला मी मजला विसरून गेलो
स्वप्नाळू डोळ्यांत तुझ्या मी अलगद उतरून गेलो

हटता न हटे तसबीर मजसमोरुन तुझी
पुलकित आभास तुझा, मी क्षणभर मोहरून गेलो

लावे वेड जीवा मनमोहिनी हास्य तुझे
तुझ्या हसण्यात जणू, मी मला हरवून गेलो

अल्लड चेहऱ्यावर तुझ्या कसली ही उत्सुकता
मी प्रियकर तुझा, क्षणभर मज समजून गेलो

सांगता काही अशी, लाजून का गेलीस तू?
मोकळ्या भाळी तुझ्या, मी मला निरखून गेलो

मृगजळी अस्तित्व तुझे जाणतो मी जरी
चाहूलीने नुसत्या तुझ्या, आज मी हरखून गेलो.

अभिजित....

Labels:

Monday, September 18, 2006

या एकांती

या एकांती स्वप्न दिसले मला
या एकांती विश्व गवसले मला

शोधले फ़ुकाच स्वत्व: दाहीदिशा
या एकांती येऊनी बिलगले मला

कल्लोळ श्वापदांचा अहोरात्र चालला
या एकांती शांतपण लाभले मला

यंत्रांच्या दुनियेत माणूस(पण) हरवला(ले)
या एकांती हे ही जाणवले मला

मी मला एकटा म्हणू कसा?
या एकांती कवितेने कवळले मला.

अभिजित...

Labels:

Wednesday, September 13, 2006

दास चरणीचा तुझ्या

धुंद या रात्री अशा, गंध केसांचा तुझ्या
उठते पहाट ऐकुनी नाद पैजणांचा तुझ्या

रुळते बट गालावरी, विस्कटला भांग तुझा
करतो घायाळ मला शर नयनांचा तुझ्या

मृदू सिंहकटी, चाल गजगामिनी तुझी
वाटतो हवाहवासा मज पाश बाहूंचा तुझ्या

उतरो न नशा ही पागल मिठीची तुझ्या
पाजून टाक जाम मत्त ओठांचा तुझ्या

हरलो मी स्वत्व तुझ्यात, झाली 'जीत' तुझी
बनवून टाक मला दास चरणीचा तुझ्या

अभिजित...

Labels: